Viuem moments intensi. Eth procès de division territoriau en Catalunya auance frut des interèssi politics, longui d’explicar mès que totun, non son en absolut tangenciaus ath procès. En tot sajar de non allongar-me massa en pòst voi explicar eth mèn rasoament e vos emplaçi a liéger er article publicat enes diaris Mañana e Segre sus aguesta question.
Era Vegueria com element de descentralizacion dera Generalitat ei inacceptabla tara Val d’Aran perque atempte contra eth principi de singularitat que recuelh er article 11 der Estatut e per tant, enes tèrmes qu’era Lei non recuelhe aquera singularitat atempte contra es principis estatutaris que fondamenten era nòsta especificitat.
Er encaish d’Aran ena Lei de division territoriau a d’èster jos eth principi qu’er unic supòsit qu’obligue a Aran, ei eth manament constitucionau segontes eth quau es municipis aranesi son obligadi a demorar restacadi a un àmbit supramunicipau. Actuaument, er àmbit ei Deputacion de Lhèida. Aguest cambi, de produsir-se a d’èster en condicions determinades e pactades, en supòsit que se produsisquen es cambis enes Leis Estataus que regulen es divisions territoriaus provicinciaus e que ne permeterien modificar es tèrmes.
En aguest sens quinsevolh aute plantejament a d’èster frontaument refusat sigue quin sigue er origen. A d’èster refusat en tot cercar era unitat des fòrces politiques araneses qu’an d’actuar en blòc e sens division.
Me cau lamentar qu’er alcalde de Vielha non ac comprene atau e qu’utilize aguest ahèr tà hèr politica de partit. Jo è garantit refusar aguesta Lei e non atier a cap rason que non sigue era defensa d’Aran. En an 1987 Aran se convertic en “comarca”. Qué heren alavetz es representants de CDA en Parlament catalan, e en Aran ? Calerà un còp mès rebrembar era istòria e méter a cada un en sòn lòc. De moment, defensem eth país e es sues institucions, ja haram eth debat en Plen deth Conselh. De cara a dehòra UNITAT
