Euròpa ei dejà eth nòste futur collectiu. A despièch des dificultats deth procès, Euròpa ei un projècte compartit, un espaci comun de ciutadania, qu’a articulat coma jamès es politiques dera proximitat, era subsidiarietat e era descentralizacion. Totun, Euròpa non s’enten sense aguesti principis basics que dan sentit ara sua realitat mès paupabla: era realitat des pòbles, regions, comunautats e territòris, que, en tot apregondir era sua identitat, an desvolopat era integracion comunautària, mès enlà des vielhes termières, mès apròp des naui besonhs d’enteniment e cooperacion territoriau.
Territòris aluenhadi e fronterèrs coma era Val d’Aran, país damb ua identitat plan mercada, an trobat ena Union Europèa eth sòn esturment de dinamizacion territoriau e promocion economica e de supòrt as accions ruraus, ramadères e mieiambientaus. Ara madeish, èm en procès de barrar un nau projècte Interreg entre eth Conselh Generau d’Aran e era Communauté de Communes du Saint Gaudinois (Haute Garonne) entara digitalizacion deth territòri damb era aplicacion des naues tecnologies en matèries coma era salut, era promocion toristica, era educacion e eth foment der occitan, e trabalham tanben damb d’auti territòris damb es quaus podem compartir projèctes de dinamizacion toristica. Eth pòrt transfronterèr de Eth Portilhon, a on eth Govèrn d’Aran cree eth sòn Parc de Montanha, n’ei un bon exemple, pr’amor qu’eth Conselh e es viles de Bossòst e Luchon an era fèrma volentat de hèr d’aguesta montanha un espaci d’interpretacion deth pirineisme e un circuit de gòi faunistic e paisatgistic.
Mès ara Euròpa a de besonh de dar un pas mès entà dauant. Cau apropar-la entath ciutadan, perque quinsevolh politica publica eficaça ei ua politica qu’a coma centre ath ciutadan. Eth Govèrn deth Conselh Generau trabalhe entà crear un espaci comun sanitari damb era Administracion francesa, pr’amor que volem interconnectar es centres de referéncia d’aguest encastre deth Pirenèu entà aufrir un mielhor servici as usatgèrs d’andús costats dera termièra. Aqueth ei eth camin qu’era Union a de seguir damb mès determinacion: eth dera ciutadania compartida damb drets e deuers, era Euròpa sociau des persones que susvelhe e refortilhe ua des granes hites deth vielh continent enes darrères decades: er Estat deth benèster e es politiques de proteccion e inversion publiques, que cau renauir entà, en tot cas, consolidar-les coma un des pilars imprescindibles dera democràcia contemporanèa en ua economia sociau de mercat, ara mès que jamès quan fòrça des nòsti ciutadans e ciutadanes passen moments de dificultats e malurs socioeconomics.
Es recèptes neoliberaus mos an amiat entara crisi financèra e economica qu’ara patim. Sabem es resultats que pòrten es politiques dera desregulacion e es privatizacions massives: dèishen ara intempèrie ara majoria. Per aguesti motius, cau hèr ua crida a bastir Euròpa a compdar dera proximitat as ciutadans, en tot apuntelar es principis fonamentaus dera subsidiarietat e era participacion. Mos cau apostar pera Euròpa sociau, aquera que vò preservar eth modèl de drets universaus, qu’a eth prètzhèt de combàter es politiques neoliberaus més draconianes. En definitiva, Euròpa a d’èster mès unida e propèra, respectuosa damb era diversitat, economicament sostenibla e socialment justa.
